वीरगंज,४ भदौ । रसुवाको भोटेकोशी नदीमा आएको विनाशकारी बाढीमा परी लामो समयदेखि बेपत्ता रहेका वीरगंज महानगरपालिका–२२ जगरनाथपुरका ६ जनाका परिवारलाई वीरगंज महानगरपालिकाले आवश्यक राहत तथा सहयोग उपलब्ध गराउने भएको छ ।
भदौ १० गते बिहान भोटेकोशी नदीमा आएको अचानकको बाढीपछि जगरनाथपुरको एउटै टोलका ६ जना सम्पर्कविहीन भएका थिए । बाढी आएको लामो समय बितिसक्दा पनि उनीहरूको अवस्था अझै अज्ञात छ । बेपत्ता हुनेमा टिमुरेबाट पाँच जना र बेत्रावतीबाट एक जना रहेका छन् । आइतबार वीरगंज महानगरपालिकाका प्रमुख राजेशमान सिंह र पूर्वमन्त्री प्रदीप यादव जगरनाथपुर पुगेर बेपत्ता व्यक्तिका परिवारसँग भेट गरेका छन् । भेटका क्रममा उनीहरूले परिवारका सदस्यबाट बेपत्ताको अवस्था, अहिलेसम्म भएका खोजी प्रयास तथा परिवारले भोगिरहेको समस्या र पीडाबारे जानकारी लिएका थिए ।
नगरप्रमुख सिंहले बेपत्ता परिवारको पीडामा महानगरपालिका साथमा रहेको बताउँदै तत्काल आवश्यक राहत तथा सहयोग उपलब्ध गराउने प्रतिबद्धता जनाए । उनले बेपत्ताको खोजी, पहिचान तथा परिवारलाई आवश्यक सहयोगका लागि सम्बन्धित निकायसँग समन्वय गर्ने बताए । “आफ्नो परिवारको सदस्यको अवस्थाबारे अनिश्चित भएर बस्नुपर्दाको पीडा निकै गम्भीर हुन्छ । यो दुःखको घडीमा वीरगंज महानगरपालिका बेपत्ता परिवारसँगै छ । महानगरपालिकाको तर्फबाट तत्काल गर्न सकिने सहयोग उपलब्ध गराउनेछौँ र आवश्यक समन्वय पनि गर्नेछौँ,” सिंहले भने ।
भोटेकोशी बाढीपछि सम्पर्कविहीन हुनेमा २१ वर्षीय साहबुद्दिन मन्सुरी, २० वर्षीय राहुल मियाँ, १४ वर्षीय सरताज मियाँ, १७ वर्षीय समिम आलम, २० वर्षीय सर्फराज मियाँ र १६ वर्षीय रिजवान अन्सारी रहेका छन् । साहबुद्दिन, राहुल, सरताज, समिम र सर्फराज रसुवाको टिमुरेस्थित मोटरसाइकल ग्यारेजमा काम गर्न पुगेका थिए । रिजवान भने बेत्रावती–१० स्थित अन्सारी मोटरसाइकल वर्कसपमा काम गर्न पुगेका थिए । भदौ १० गते बिहान भोटेकोशीमा आएको बाढीपछि उनीहरू परिवारको सम्पर्कमा आएका छैनन् ।
समिम आलमका बुवा तैयब मियाँ मन्सुरीले छोराको खोजीका लागि परिवारका सदस्य टिमुरेसम्म पुगे पनि कुनै जानकारी प्राप्त गर्न नसकेको बताए । उनका अनुसार परिवारले छोराको खोजीका क्रममा शव राखिएको स्थानसम्म पुगेर समेत हेरेको थियो । “छोरा भेटिन्छ कि भनेर टिमुरेसम्म पुग्यौँ । शव राखिएको ठाउँमा समेत पुगेर खोज्यौँ, तर छोराको कुनै अत्तोपत्तो भएन,” उनले भने । समिमका बुवा तैयबका दाजु उजिर मियाँ मन्सुरीका छोरा सर्फराज पनि बाढीपछि बेपत्ता छन् । एउटै परिवारका दुई दाजुभाइका एक–एक छोरा बेपत्ता भएपछि परिवारमा थप पीडा थपिएको छ । उनीहरूकै आफन्त अहमद मियाँका छोरा २० वर्षीय राहुल मियाँसमेत बाढीपछि सम्पर्कविहीन छन् । बेपत्ताको पहिचान गर्न भेटिएका शवसँग डीएनए परीक्षणमार्फत मिलान गर्ने उद्देश्यले परिवारका सदस्यले रगतको नमुनासमेत बुझाएका छन् । तर अहिलेसम्म उनीहरूका परिवारले आफ्ना आफन्तको अवस्थाबारे कुनै निश्चित जानकारी पाउन सकेका छैनन् ।
१४ वर्षीय सरताज मियाँ मोटरसाइकल बनाउने काम सिक्न बाढी आउनुभन्दा करिब दुई महिनाअघि मात्रै टिमुरे पुगेका थिए । त्यस्तै, साहबुद्दिन र सर्फराज पनि टिमुरे गएको करिब दुई साता मात्रै भएको परिवारजनले बताएका छन् । साहबुद्दिनका बुवा अली मियाँ अझै पनि छोराको मोबाइल नम्बरमा फोन गरिरहेका छन् । बाढी आएको दिनदेखि नै फोन गर्दा कतै सम्पर्क भइहाल्छ कि र छोरा फर्केर आउँछ कि भन्ने आशा आफूले नछाडेको उनले बताए ।“बाढी आएको दिनदेखि नै नम्बरमा फोन गरिरहेको छु । कतै फोन लागिहाल्छ कि, छोरा फर्केर आउँछ कि भन्ने आशा अझै छ,” अलीले भने ।भेटका क्रममा पूर्वमन्त्री यादवले विपद्का कारण आफन्त बेपत्ता भएका परिवारलाई राज्यका सबै तहबाट सहयोग र समन्वय आवश्यक रहेको बताए । उनले पीडित परिवारको अवस्था बुझेर राहत तथा आवश्यक सहयोगका लागि सम्बन्धित निकायसँग समन्वय गर्ने प्रतिबद्धता जनाए ।
वीरगंज महानगरपालिकाले जगरनाथपुरका यी ६ परिवारसँगै भोटेकोशी बाढीमा परी बेपत्ता भएका वीरगंजका अन्य परिवारलाई समेत आवश्यक सहयोग उपलब्ध गराउने तयारी गरेको जनाएको छ । बाढीपछि आफन्तको अवस्थाबारे अनिश्चिततामा रहेका परिवारलाई राहत, खोजी तथा पहिचान प्रक्रियामा सहजीकरण गर्न महानगरपालिकाले सम्बन्धित निकायसँग समन्वय गर्ने जनाएको छ ।