काठमाडौं,०९ मंसिर । आगामी फागुन २१ गतेका लागि तय भएको प्रतिनिधिसभा सदस्य निर्वाचनका लागि राजनीतिक दलहरूले निर्वाचन आयोगमा दर्ता गराउने क्रम तीव्र बनेको छ ।
आजसम्ममा प्रमुख दलहरू नेपाली कांग्रेस र नेकपा एमालेसहित कूल ६८ वटा राजनीतिक दलहरू ले निर्वाचन प्रयोजनका लागि दल दर्ता गरिसकेको निर्वाचन आयोगका प्रवक्ता महादेव पन्थले जानकारी दिएका छन् ।
निर्वाचन आयोगले प्रतिनिधिसभा निर्वाचनमा भाग लिन चाहने राजनीतिक दलहरूका लागि दल दर्ताको अन्तिम समयसीमासम्म निर्धारण गरेको छ । प्रवक्ता पन्थले बाँकी राजनीतिक दलहरूलाई पनि समयभित्रै दर्ता भएर प्रतिस्पर्धामा भाग लिन आह्वान गरेका छन् ।
यस क्रममा, नेकपा एमालेले अपनाएको दोहोरो रणनीति राजनीतिक वृत्तमा चर्चाको विषय बनेको छ । एमालेले एकातिर प्रतिनिधिसभा पुनर्स्थापनाको माग गर्दै सर्वोच्च अदालतमा रिट दायर गरेको छ भने अर्कोतिर निर्वाचनमा भाग लिन आयोगमा दल दर्ता पनि गराएको छ । एमालेका नेताहरूले भने आफूहरूको मुख्य बटमलाइन भने प्रतिनिधिसभा पुनर्स्थापना नै रहेको स्पष्ट पारेका छन् ।
यसैबीच, निर्वाचन आयोगले विदेशमा रहेका नेपाली नागरिकलाई पनि मतदानमा सहभागी गराउने विषयमा सरकारसँग गम्भीर छलफल भइरहेको जानकारी दिएको छ । यद्यपि, विदेशी नागरिकलाई मताधिकारको विषयमा आवश्यक कानुन बनिसकेपछि मात्र निश्चित हुने प्रवक्ता पन्थको भनाइ छ । निर्वाचन आयोग स्वच्छ, निष्पक्ष र भयरहित वातावरणमा निर्वाचन सम्पन्न गर्न प्रतिबद्ध रहेको पनि उनले बताएका छन् ।