काठमाडौं,११ पुस । नवनियुक्त परराष्ट्रमन्त्री बालानन्द शर्माले आज पदभार ग्रहण गरेका छन् । आजै मन्त्रीमा नियुक्त भएका शर्माले राष्ट्रपति भवन शीतलनिवासमा शपथ ग्रहण गरेलगत्तै परराष्ट्र मन्त्रालयको जिम्मेवारी सम्हालेका हुन् ।
नेपाली सेनाका पूर्वरथी समेत रहेका शर्मालाई प्रधानमन्त्री सुशीला कार्कीले परराष्ट्रमन्त्रीको जिम्मेवारी दिएकी हुन् । यसअघि परराष्ट्र मन्त्रालयको जिम्मेवारी प्रधानमन्त्री कार्की आफैंले सम्हाल्दै आएकी थिइन् ।
केही दिनअघि प्रधानमन्त्री कार्कीले शर्मालाई सरकारमा सहभागी हुन प्रस्ताव गरेकी थिइन्, जसमा शर्माले सकारात्मक प्रतिक्रिया दिएका थिए । शर्माको कूटनीतिक अनुभव र विज्ञतालाई ध्यानमा राख्दै परराष्ट्र मन्त्रालयको जिम्मेवारी दिइएको प्रधानमन्त्री निकट स्रोतले जनाएको छ ।
नयाँ मन्त्रीको नियुक्तिसँगै प्रधानमन्त्री कार्कीले रक्षा र खानेपानी मन्त्रालय भने आफूसँगै राखेकी छन् । आजको मन्त्रिपरिषद् विस्तार प्रधानमन्त्री कार्की नेतृत्वको सरकारले गरेको पाँचौँ विस्तार हो ।