वीरगंज,२४ भदौ । नेकपा (एमाले) वीरगंज महानगर कमिटीका उपाध्यक्ष रामकिशोर सिंह (पराग) ले प्रधानमन्त्री केपी शर्मा ओलीलाई पदबाट राजीनामा दिन आग्रह गरेका छन्।
सोमबार सामाजिक सञ्जाल फेसबुकमार्फत उनले जेन जेड आन्दोलनका क्रममा निर्दोष बालबालिका र युवाको ज्यान गएको घटनाले मुलुक स्तब्ध बनेको भन्दै प्रधानमन्त्रीको पदमा बस्ने नैतिक आधार नभएको टिप्पणी गरेका हुन्।
उनले लेखेका छन्– “प्रधानमन्त्रीज्यू, यो दु:खद् घटनापछि तपाईँको पदमा बस्ने कुनै नैतिक आधार छैन। तत्काल राजीनामा दिनुहोस्, सत्यतथ्य पत्ता लगाउन स्वतन्त्र उच्चस्तरीय छानबिन समिति गठन गर्नुहोस् र दोषीलाई कडाभन्दा कडा कानूनी कारबाही सुनिश्चित गर्नुहोस्।”
सिंहले आन्दोलनमा स्वतन्त्र युवाको नाममा विभिन्न राजनीतिक दलसँग आवद्ध युवाहरूले साधन र स्रोतको दुरुपयोग गरेको आरोप पनि लगाएका छन्। उनले आन्दोलन शान्तिपूर्ण बाटोमा सीमित हुन नसक्नुमा राजनीतिक प्रभाव र अतिवादी धार हाबी भएको बताएका छन्।
उनले दलका युवाले पार्टीगत पहिचान प्रष्ट पार्नुपर्ने भन्दै “स्वतन्त्र युवा भन्दै आउनेहरूले पार्टीबाट राजीनामा दिएर आउनु पर्छ, नभए आफू कुन पार्टीका हो भन्ने स्पष्ट घोषणा गर्नुपर्छ” भन्ने धारणा सार्वजनिक गरेका छन्।
सिंहले सरकारलाई पनि घटनामा संयमित हुनुपर्नेमा आलोचना गर्दै “सरकार किलरको भूमिकामा देखियो, यस्तो स्थिति मुलुकका लागि अझ ठूलो संकट निम्त्याउन सक्छ” भन्दै विवेकपूर्ण निर्णय लिन प्रधानमन्त्रीलाई आग्रह गरेका छन्।