वीरगंज,१२ भदौ । पर्साको सखुवा प्रसौनी गाउँपालिकाले रसुवाको भोटेकोशी क्षेत्रमा बाढीपहिरोबाट प्रभावित परिवारको राहत तथा पुनर्स्थापनाका लागि ५ लाख रुपैयाँ आर्थिक सहयोग गर्ने भएको छ ।
गाउँपालिका अध्यक्ष यशवन्त यादवका अनुसार रसुवामा आएको विनाशकारी बाढीपहिरोबाट प्रभावित परिवारलाई राहत उपलब्ध गराउने उद्देश्यले गाउँपालिकाको तर्फबाट ५ लाख रुपैयाँ सहयोग गर्ने निर्णय गरिएको हो । प्राकृतिक विपद्का कारण ठूलो जनधनको क्षति भएकामा दुःख व्यक्त गर्दै अध्यक्ष यादवले विपत्तिको समयमा एक–अर्कालाई सहयोग गर्नु सबैको मानवीय दायित्व भएको बताए । बाढीपहिरोबाट प्रभावित परिवारको उद्धार, राहत तथा पुनर्स्थापनाका लागि केही भए पनि सहयोग पुगोस् भन्ने उद्देश्यले गाउँपालिकाले उक्त रकम उपलब्ध गराउन लागेको उनले स्पष्ट पारे ।
रसुवाको भोटेकोशी क्षेत्रमा आएको बाढीपहिरोका कारण ठूलो जनधनको क्षति भएपछि प्रभावितको उद्धार तथा राहतका लागि विभिन्न क्षेत्रबाट सहयोग जुट्ने क्रम जारी छ । विपद्को समयमा प्रभावित परिवारलाई तत्काल राहत उपलब्ध गराउनुका साथै उनीहरूको पुनर्स्थापनामा सहयोग पुर्याउने उद्देश्यले विभिन्न स्थानीय तह, संघसंस्था तथा अन्य क्षेत्रबाट सहयोग घोषणा भइरहेका छन् । यसै क्रममा सखुवा प्रसौनी गाउँपालिकाले पनि मानवीय सहयोगस्वरूप ५ लाख रुपैयाँ उपलब्ध गराउने निर्णय गरेको हो । गाउँपालिकाले घोषणा गरेको उक्त रकम सम्बन्धित राहत कोष वा प्रभावित क्षेत्रमा छिट्टै हस्तान्तरण गरिने जनाइएको छ ।
गाउँपालिकाले विपद्बाट प्रभावित परिवारलाई राहत तथा पुनर्स्थापनाका लागि आफ्नोतर्फबाट सहयोग उपलब्ध गराउँदै विपत्तिको समयमा स्थानीय तहहरूबीचको मानवीय सहकार्य र सहयोगको भावनालाई समेत निरन्तरता दिएको जनाएको छ ।