काठमाडौं,१२ साउन । त्रिभुवन विश्वविद्यालय (त्रिवि) को स्नातकोत्तर तह (एमबीएस) प्रथम सेमेस्टरको प्रश्नपत्र परीक्षाअघि नै सार्वजनिक भएको प्रकरणमा प्रहरीले थप दुई जनालाई पक्राउ गरेको छ। नेपाल प्रहरीको केन्द्रीय अनुसन्धान ब्युरो (सीआईबी) को टोलीले घटनामा संलग्न रहेको आरोपमा दुई जनालाई नियन्त्रणमा लिएको हो।
सीआईबीका अनुसार पक्राउ पर्नेमा रौतहटको राजदेवी नगरपालिका–४ का २५ वर्षीय अतुल कुमार मिश्र र बाराको लिपनीमालका ३१ वर्षीय अब्दुल सानी हाकिम रहेका छन्। एमबीएस प्रथम सेमेस्टरको प्रश्नपत्र परीक्षा सुरु हुनुअघि नै बाहिरिएको घटनापछि सीआईबीले अनुसन्धान अघि बढाएको थियो। अनुसन्धानका क्रममा थप प्रमाण र संलग्न व्यक्तिहरूको पहिचान भएपछि प्रहरीले दुई जनालाई नियन्त्रणमा लिएको हो।
यससँगै प्रश्नपत्र बाहिरिएको घटनामा पक्राउ पर्नेको संख्या चार पुगेको छ। प्रश्नपत्र सार्वजनिक भएको विषयलाई गम्भीर रूपमा लिँदै सीआईबीले घटनाको सूक्ष्म अनुसन्धान गरिरहेको जनाएको छ। सीआईबीले यसअघि नै घटनामा संलग्न रहेको आशंकामा दुई जनालाई पक्राउ गरिसकेको थियो। पछिल्लो पक्राउसँगै अनुसन्धानको दायरा थप फराकिलो बनाइएको प्रहरीले जनाएको छ।
सीआईबीका एसएसपी अनुपम शमशेर जबराका अनुसार पक्राउ परेका व्यक्तिहरूमाथि शिक्षा ऐनअन्तर्गतको कसुरमा मुद्दा दर्ता गरी विस्तृत अनुसन्धान भइरहेको छ। उनका अनुसार परीक्षाको गोपनीयता भंग गर्ने कार्यमा संलग्न अन्य व्यक्ति तथा सम्भावित गिरोहको खोजीसमेत जारी छ। प्रहरीले प्रश्नपत्र बाहिरिने घटनाको वास्तविक कारण, संलग्न व्यक्तिहरूको भूमिका र घटनासँग जोडिएका अन्य पक्षबारे अनुसन्धान गरिरहेको जनाएको छ।
त्रिभुवन विश्वविद्यालयको परीक्षा प्रणालीको विश्वसनीयता र गोपनीयतामाथि प्रश्न उठाउने यस घटनालाई प्रहरीले संवेदनशील रूपमा लिएको छ। दोषी पहिचान गरी कानुनी कारबाही गर्ने तयारी भइरहेको बताइएको छ।