काठमाडौँ, २४ जेठ । सरकारले शनिबार र आइतबार दुई दिन सार्वजनिक बिदा दिँदै आएको व्यवस्था अन्तर्गत आइतबारको बिदा खारेज गर्ने तयारी भइरहेको भन्ने समाचारलाई असत्य भन्दै खण्डन गरेको छ।
केही सञ्चारमाध्यममा सरकारले हप्तामा दुई दिन दिइँदै आएको सार्वजनिक बिदामध्ये आइतबारको बिदा हटाउने तयारी गरेको समाचार प्रकाशित भएपछि सरकारले त्यसलाई स्पष्ट रूपमा अस्वीकार गरेको हो।
प्रधानमन्त्री वालेन्द्र शाहका प्रेस तथा अनुसन्धान विज्ञ दीपा दाहालले आइतबारको बिदा खारेज गरिएको भन्ने समाचार गलत भएको बताएकी छन्। उनले भनिन्, “यस विषयमा सरकारले कुनै निर्णय गरेको छैन र हाल यससम्बन्धी कुनै तयारी पनि छैन।”
यसअघि पश्चिम एसियामा देखिएको समस्या र इन्धनको मूल्यवृद्धिलगायत कारण जनजीवनलाई सहज बनाउन गत चैत २२ गते बसेको मन्त्रिपरिषद् बैठकले शनिबार र आइतबार सार्वजनिक बिदा दिने निर्णय गरेको थियो। सो निर्णयअनुसार कार्यालय समय बिहान ९ बजेदेखि अपराह्न ५ बजेसम्म कायम गरिएको थियो।