बारा ( बारागढी), २ जेठ । बाराको बारागढी गाउँपालिका वडा नम्बर–१ मा राष्ट्रिय स्वतन्त्र पार्टी (रास्वपा) को वडा तदर्थ समिति गठन गरिएको छ। पार्टी संगठनलाई वडा तहसम्म मजबुत बनाउने उद्देश्यका साथ सम्पन्न भेलाले ११ सदस्यीय वडा तदर्थ समिति सर्वसम्मत रूपमा चयन गरेको हो।
नवनिर्वाचित तदर्थ समितिको अध्यक्षमा मुकेश दास चयन भएका छन् भने उपाध्यक्षको जिम्मेवारी लालबाबु पसवानलाई दिइएको छ। त्यसैगरी सचिवमा सिकिन्द्र साह कलवार चयन भएका छन्। समितिमा अन्य ८ सदस्यसमेत समेटिएका छन्। पार्टीको स्थानीय संगठन विस्तार, जनसमस्याको पहिचान तथा समाधानका लागि सक्रिय भूमिका निर्वाह गर्ने लक्ष्यसहित समिति गठन गरिएको जनाइएको छ।
समिति गठनका लागि आयोजित भेलामा स्थानीय नेता–कार्यकर्ता, समर्थक तथा शुभेच्छुकहरूको उल्लेख्य सहभागिता रहेको थियो। कार्यक्रममा बोल्ने वक्ताहरूले गाउँ–गाउँमा पार्टीको पहुँच विस्तार गर्दै जनताका आवाजलाई प्रभावकारी रूपमा उठाउने प्रतिबद्धता व्यक्त गरेका थिए। उनीहरूले स्थानीय तहका विकास, शिक्षा, स्वास्थ्य, रोजगारी, कृषि तथा आधारभूत सेवासँग सम्बन्धित मुद्दालाई प्राथमिकतामा राखेर अगाडि बढ्ने धारणा राखेका थिए।वक्ताहरूले पुराना राजनीतिक अभ्यासप्रति जनतामा बढ्दो निराशाबीच वैकल्पिक राजनीतिक शक्तिको रूपमा रास्वपाप्रति जनविश्वास बढ्दै गएको उल्लेख गर्दै संगठन विस्तारलाई थप प्रभावकारी बनाउने बताएका छन्। स्थानीय स्तरमै जनगुनासो सुन्ने, समस्याको समाधानका लागि पहल गर्ने तथा जनताको पक्षमा आवाज उठाउने उद्देश्यले वडा तहमा समिति गठन गरिएको उनीहरूको भनाइ थियो।
भेलामा सहभागीहरूले संगठनलाई थप सुदृढ बनाउँदै आगामी दिनमा गाउँस्तरबाट जनताको हित, सुशासन र पारदर्शिताका पक्षमा सक्रियतापूर्वक काम गर्ने प्रतिबद्धता व्यक्त गरेका छन्। नवगठित समितिले पार्टीको नीति तथा कार्यक्रमलाई जनस्तरसम्म पुर्याउने, नयाँ सदस्यता विस्तार गर्ने तथा स्थानीय मुद्दालाई प्राथमिकताका साथ उठाउने अपेक्षा गरिएको छ।