काठमाडौं,०४ बैशाख । प्रत्येक वर्ष वैशाख कृष्ण औँसीका दिन मनाइने आमाको मुख हेर्ने पर्व आज देशभर श्रद्धा, भक्ति र सम्मानका साथ मनाइँदैछ। यस दिनलाई जन्मदात्री आमाप्रति कृतज्ञता प्रकट गर्ने विशेष अवसरका रूपमा लिने गरिन्छ।
शास्त्रीय मान्यता अनुसार उपाध्याय, आचार्य र पिताभन्दा पनि आमा महान् मानिन्छिन्। त्यसैले आमाप्रति श्रद्धा, भक्ति र आदर प्रकट गर्दै उहाँबाट आशीर्वाद थाप्ने दिनका रूपमा यो पर्व स्थापित भएको हो।
परम्पराअनुसार छोराछोरी बिहानै स्नान गरी आमालाई नयाँ लुगा लगाइदिने, मीठा तथा पोषिलो खानेकुरा खुवाउने र आशीर्वाद लिने गर्छन्। आमा नभएकाहरूले भने दिवङ्गत आमाको सम्झनामा तर्पण, पिण्डदान तथा ब्राह्मणलाई भोजन गराउने प्रचलन रहेको छ।
वैदिक सनातन धर्म अनुसार प्रत्येक व्यक्तिले देवऋण, मनुष्यऋण र पितृऋण तिर्नुपर्ने मान्यता छ। ‘जननी जन्मभूमिश्च स्वर्गादपि गरियसी’ भन्ने उक्ति मार्फत आमा र जन्मभूमिको महत्वलाई उच्च स्थान दिइएको छ।
धर्मशास्त्रविद्हरूका अनुसार आमाले सन्तानलाई नौ महिनासम्म गर्भमा धारण गरी जीवन दिने भएकाले उहाँको महत्व सबैभन्दा उच्च मानिन्छ। त्यसैले जीवित आमालाई सम्मान गरी खुसी बनाउने र दिवङ्गत आमाको सम्झनामा श्राद्ध गर्ने परम्परा रहिआएको छ।
यसै अवसरमा काठमाडौंको चन्द्रागिरि नगरपालिकास्थित मातातीर्थमा आज विशेष मेला लागेको छ। मेलाका लागि आवश्यक सम्पूर्ण तयारी पूरा भएको नगरपालिकाले जनाएको छ।