काठमाडौँ,१५ पुस । राष्ट्रिय स्वतन्त्र पार्टी (रास्वपा) र उज्यालो नेपाल पार्टी (उनेपा) बीच एकता सम्बन्धी सहमति पत्रमा हस्ताक्षर भएको छ। मुलुकको परिवर्तित राजनीतिक परिस्थितिमा नयाँ राजनीतिक शक्तिको आवश्यकता महसुस गर्दै दुवै दलबीच सहकार्य र एकताको सहमति भएको हो।
सहमति पत्रमा २०८२ साल भदौ २३ र २४ मा सम्पन्न जेन–जी आन्दोलनसहित विभिन्न कालखण्डका जनआन्दोलनका शहीद तथा घाइतेहरूको बलिदानप्रति सम्मान प्रकट गर्दै, उनीहरूका परिवारका मागहरू यथोचित रूपमा सम्बोधन गर्ने प्रतिबद्धता जनाइएको छ। भ्रष्टाचार र कुशासनविरुद्ध नवयुवाहरूले देखाएको आन्दोलनको मर्मलाई आत्मसात् गर्दै सामाजिक न्यायसहितको उदार अर्थतन्त्र र बहुलवादी लोकतान्त्रिक प्रणालीभित्र सुशासन कायम गर्ने लक्ष्य सहमतिमा उल्लेख छ।
एकतापछि स्थापित हुने राजनीतिक दलको नाम ‘राष्ट्रिय स्वतन्त्र पार्टी’ रहने, पार्टीको झन्डा साबिककै निलो पृष्ठभूमिमा सेतो गोलाकारभित्र निलो घण्टीको आकृति रहने तथा चुनाव चिन्ह ‘घण्टी’ नै कायम रहने सहमति भएको छ। पार्टीको केन्द्रीय कार्यालय काठमाडौँ उपत्यकामा रहने जनाइएको छ।
सहमति अनुसार राष्ट्रिय स्वतन्त्र पार्टीको केन्द्रीय सभापतिमा रवि लामिछाने रहनेछन् भने उपसभापतिमा कुलमान घिसिङ, डी.पी. अर्याल र स्वर्णिम वाग्ले रहनेछन्। उज्यालो नेपाल पार्टीका युवा अभियन्ता तथा अनुभवी विज्ञहरूलाई पार्टीको संगठनात्मक संरचनामा समुचित रूपमा समायोजन गर्ने, जिम्मेवारी बाँडफाँड गर्दा योग्यता, समावेशिता र सार्वजनिक छविलाई आधार मानिने उल्लेख छ।
त्यसैगरी उज्यालो र आत्मनिर्भर अर्थतन्त्र, डेलिभरीमा आधारित राजनीति, मेरिटोक्रेसीको स्थापना, भ्रष्टाचारप्रति शून्य सहनशीलता र सुशासनमार्फत आगामी दश वर्षभित्र नेपाललाई सम्मानजनक मध्यम आय भएको राष्ट्र बनाउने लक्ष्यसहितको मार्गचित्र इमानदारीपूर्वक कार्यान्वयन गर्ने प्रतिबद्धता व्यक्त गरिएको छ।
सहमति बमोजिम राष्ट्रिय स्वतन्त्र पार्टीसम्बन्धी सबै दस्तावेज निर्वाचन आयोगमा अद्यावधिक गरिने र लोकतान्त्रिक सुशासन, समुन्नति तथा सामाजिक न्यायका मुद्दामा विश्वास गर्ने अन्य वैकल्पिक तथा परिवर्तनकामी राजनीतिक शक्ति, समूह र व्यक्तिहरूलाई पनि एकताका लागि आव्हान गरिएको छ।
सहमति पत्रमा रास्वपाका सभापति रवि लामिछाने र उज्यालो नेपाल पार्टीका अध्यक्ष अनुपकुमार उपाध्यायले हस्ताक्षर गरेका छन् भने बालेन्द्र शाह साक्षीका रूपमा रहेका छन्।