वीरगंज,०३ पुस । भदौ २३ र २४ गते जेन–जी आन्दोलनका क्रममा वीरगंजमा सार्वजनिक तथा निजी सम्पत्तिमा भएको तोडफोड, आगजनी र लुटपाटका घटनामा संलग्न भएको आरोपमा प्रहरीले पक्राउ प्रक्रिया सुरु गरेको छ । आन्दोलन भएको करिब तीन महिनापछि मात्रै जिल्ला प्रहरी कार्यालय पर्साले उक्त घटनामा संलग्नहरूलाई कानुनी दायरामा ल्याउन थालेको हो ।
यसैक्रममा वीरगंज महानगरपालिकाका मेयर राजेशमान सिंहको वीरगंज महानगरपालिका वडा नम्बर ३ स्थित निजी निवासमा आगजनी गरेको आरोपमा एक युवकलाई प्रहरीले बिहीबार पक्राउ गरेको छ । पक्राउ पर्ने व्यक्ति वीरगंज महानगरपालिका वडा नम्बर १० रानीघाट निवासी अन्दाजी ४० वर्षीय रञ्जन सिंह राजपूत रहेको प्रहरीले जनाएको छ ।
पर्साका प्रहरी उपरीक्षक सुदीपराज पाठकका अनुसार, राजपूतलाई बिहीबार बिहान सोधपुछका लागि जिल्ला प्रहरी कार्यालय पर्सामा बोलाइएको थियो । सोधपुछकै क्रममा अदालतबाट जारी पक्राउ पुर्जीका आधारमा उनलाई नियन्त्रणमा लिएर हिरासतमा राखिएको हो ।
प्रहरी उपरीक्षक पाठकले जानकारी दिएअनुसार, मेयर राजेशमान सिंहले आफ्नो निजी घरमा भएको तोडफोड, आगजनी तथा लुटपाट घटनामा संलग्नहरुविरुद्ध किटानी जाहेरी दिएका थिए । सोही जाहेरीका आधारमा पर्सा जिल्ला अदालतबाट पक्राउ पुर्जी जारी भएपछि राजपूतलाई अनुसन्धानका लागि नियन्त्रणमा लिइएको हो । उनीविरुद्ध आपराधिक उपद्रो कसुरमा मुद्दा दर्ता गरिएको प्रहरीले जनाएको छ ।
१२ देखि १५ जनाविरुद्ध पक्राउ पुर्जी
प्रहरी श्रोतका अनुसार, जेन–जी आन्दोलनका क्रममा भदौ २४ गते वीरगंजमा भएको व्यापक हिंसात्मक गतिविधिमा संलग्न १२ देखि १५ जनाविरुद्ध अदालतबाट पक्राउ पुर्जी जारी भइसकेको छ । ती घटनामा वीरगंज महानगरपालिकाको मुख्य कार्यालय, वडा नम्बर १०, १४ र २६ का कार्यालय, प्रहरी चौकी रानीघाट, अस्थायी प्रहरी पोस्ट घण्टाघर, शिव पार्वती मठ, आन्तरिक राजस्व कार्यालय, नेपाल टेलिकमको कार्यालय तथा नेपाली काँग्रेस र नेकपा एमालेका पार्टी कार्यालयमा तोडफोड, आगजनी र लुटपाट भएको थियो ।
त्यसैदिन वीरगंज महानगरपालिकाका मेयर राजेशमान सिंह, पूर्व मन्त्रीहरू प्रदीप यादव, अजय चौरसिया र राजकुमार गुप्ता, मधेस प्रदेशका पूर्व मुख्यमन्त्री लालबाबु राउत गद्दी तथा नेपाली काँग्रेसका केन्द्रीय सदस्य अनिल रुंगटाको निजी निवासमा समेत तोडफोड, आगजनी र लुटपाट भएको थियो ।
हिन्दुवादी संघसंगठनको विरोध, रिहाइको माग
राजपूत पक्राउ परेको खबर फैलिएसँगै हिन्दुवादी संघसंगठनहरूले त्यसको विरोध गरेका छन् । उनीहरूले राजपूतलाई झुटो मुद्दामा फसाइएको दाबी गर्दै बिना सर्त रिहाइको माग गरेका छन् ।
बिहीबार वीरगंजको लाल बङ्गला स्थित जिल्ला प्रहरी कार्यालय पर्साको गेट अगाडि मुख्य सडकमा टायर बालेर विरोध प्रदर्शन गर्दै हिन्दुवादी संघसंगठनहरूले प्रहरीको कदमप्रति आपत्ति जनाएका छन् । उनीहरूको आरोप छ कि राजपूत हिन्दुहरूको पक्षमा सक्रिय रहँदै आएका कारण राजनीतिक प्रतिशोधका आधारमा उनलाई जबरजस्ती हिरासतमा राखेर झुटा आरोप लगाइएको हो ।
हिन्दुवादी नेता कृष्ण साहले भने, ‘राजपूतजी हिन्दुहरूको पक्षमा आवाज उठाउँदै आएका व्यक्ति हुन् । छुट्टै विषयमा प्रहरी कार्यालय पुगेकै बेला जबरजस्ती नियन्त्रणमा लिएर झुटा मुद्दा लगाइनु सरासर अन्याय हो ।’
वीरगंजमा बढ्दो तनाव
जेन–जी आन्दोलनको तीन महिनापछि मात्र प्रहरीले आगजनी र तोडफोडका घटनामा संलग्नहरूलाई पक्राउ गर्न थालेपछि वीरगंजमा पुनः तनावको अवस्था सिर्जना भएको छ । हिन्दुवादी संघसंगठनहरूले राजपूतको पक्राउलाई राजनीतिक प्रतिशोध र हिन्दुविरोधी कदमको रूपमा चित्रण गर्दै थप आन्दोलनको चेतावनी दिएका छन् ।
यस घटनापछि वीरगंजमा सुरक्षा सतर्कता बढाइएको छ भने आगामी दिनमा थप प्रदर्शन हुन सक्ने आशङ्का स्थानीय प्रशासनले जनाएको छ ।