काठमाडौं,२३ मंसिर । जेनजी अभियानका अगुवा सुदन गुरुङले शुक्रबार प्रधानमन्त्री सुशीला कार्कीसँग सिंहदरबारमा भेट गरेका छन्। भेटका क्रममा गुरुङले सरकार र जेनजीबीच हुँदै आएको सम्झौता प्रक्रियामा भएको प्रगति बारे चासो व्यक्त गर्दै उक्त प्रक्रिया छिटो टुंग्याउन आग्रह गरेका थिए।
गुरुङले जेनजी आन्दोलनलाई औपचारिक मान्यता दिने गरी सम्झौता अघि बढाउनुपर्ने र समापन चरणमा पुगेपछि राष्ट्रपतिसमक्ष हस्ताक्षर प्रक्रिया अघि बढाउनुपर्नेमा जोड दिए।
भेटमा उनले आन्दोलनमा सहभागी भएका केही युवामाथि प्रहरीले गरेको धरपकड, धरौटी तिर्न नसक्ने अवस्था र त्यसकै कारण पुर्पक्षका लागि थुनामा पर्नुपरेको घटना प्रति पनि प्रधानमन्त्रीको ध्यानाकर्षण गराएका थिए।
गुरुङसँगै काठमाडौं महानगरपालिकाका मेयर बालेन साहका सचिवालय सदस्य कुमार बेन पनि प्रधानमन्त्री कार्कीलाई भेट्न सिंहदरबार पुगेका थिए।