काठमाडौं,०६ भदौ । नेपाल नागरिकता (दोस्रो संशोधन) विधेयक शुक्रबार बसेको राष्ट्रियसभाको बैठकबाट सर्वसम्मत रूपमा पारित भएको छ। यो विधेयक यसअघि प्रतिनिधिसभाबाट पारित भई राष्ट्रियसभामा पुगेको थियो।
राष्ट्रियसभाबाट पारित भएको विधेयक अब पुनः प्रमाणीकरणका लागि प्रतिनिधिसभामा फर्काइनेछ। त्यसपछि राष्ट्रपतिबाट प्रमाणीकरण भएर लागू हुनेछ।
आमाको नाममा सर्तसहित नागरिकता
यस संशोधन विधेयकको मुख्य विशेषता भनेको आमाको नाममा सन्तानलाई सर्तसहित नागरिकता दिने व्यवस्था गर्नु हो। अब, बाबुको विवरण नखुलेको अवस्थामा पनि आमाको नागरिकता प्रमाणपत्रका आधारमा सन्तानलाई नागरिकता दिन सकिने व्यवस्था यस विधेयकमा गरिएको छ।
तर, यसका लागि निर्धारित प्रक्रिया र सर्तहरू पूरा गर्नुपर्नेछ, जसको विस्तृत कार्यान्वयन नियमावली सरकारद्वारा तय गरिनेछ।
नागरिकता विधेयक लामो समयदेखि विवादित र चर्चाको विषय रहँदै आएको छ। आमाको नामबाट नागरिकता दिने विषयमा राजनीतिक दलहरूबीच मतभेद रहँदै आएको थियो। तर, द्वैध नागरिकता र पहिचानका विषयमा देखिएको संवेदनशीलतालाई ध्यानमा राख्दै अन्ततः विधेयक सर्वसम्मत रूपमा पारित गरिएको हो।