वीरगंज,०५ भदौ । राष्ट्रिय स्वतन्त्र पार्टी (रास्वपा) पर्सा निर्वाचन क्षेत्र नं. ३ को सभापतिमा पोखरिया निवासी मनोज कुर्मी चयन भएका छन् ।
वीरगंजस्थित कन्ट्री इन होटलमा शुक्रबार आयोजित निर्वाचन क्षेत्र पुनर्गठन तथा पदपूर्ति कार्यक्रममा कुर्मीलाई सर्वसम्मत चयन गरिएको हो । लामो समयदेखि शिक्षण पेशामा संलग्न रहेका कुर्मीले आफ्नो राजनीतिक यात्रा नेपाल विद्यार्थी संघबाट सुरु गरेका थिए । एक वर्षअघि रास्वपा संगठन विभागका सचिव शंकर श्रेष्ठ र पर्सा जिल्ला सभापति हरि पन्तले उनलाई पार्टीमा प्रवेश गराएका थिए ।
नवगठित क्षेत्रिय समितिकाे उपसभापतिमा महेन्द्र नारायण दास र सुजित कुमार, सचिवमा अरुण गुप्ता र तीन क्षेत्रीय सदस्यसहित सात सदस्यीय समिति गठन गरिएको छ ।
जिल्ला सभापति हरि पन्तले क्षेत्रीय समिति पार्टीको मेरुदण्ड भएको भन्दै क्षेत्र विस्तारले जिल्लामा संगठन बलियो हुने बताएका छन् । उनका अनुसार हालसम्म तीन क्षेत्रीय समिति गठन भइसकेको र आगामी ७ गते शनिबार ठोरीमा हुने भेलामार्फत चौथो क्षेत्रीय समिति पनि गठन हुने छ ।
भेलामा केन्द्रीय सदस्य डा. नन्दन यादव, प्रदेश सदस्य सब्बु कंडेल, पुर्षाेत्तम देव, प्रमोद सहनी, जिल्ला उपसभापति तुलसा पौडेल, सचिव सुदीश प्रजापति, कोषाध्यक्ष दिलिप कुर्मी,पर्सा क्षेत्र नं. ४ का सभापति जितेन्द्र मिश्रा लगायतको उपस्थिति थियो ।