बीरगन्ज,०५ पुस । दोेस्रो संस्करणको प्रो क्लब क्रिकेट च्याम्पियनसिपमा पर्सा–११ सँग भारतको यूपी इलाभेन ६६ रनमै अलआउट भएको छ ।
बीरगन्जको नारायणी क्रिकेट ग्राउन्डमा टस हारेर ब्याटिङको निम्तो पाएको यूपी इलाभेन १६ ओभरमा ६६ रनमै अलआउट भएको हो । उसका लागि समीर अन्सारीले २४, जयदीप सिंह र तरुण कुमारले १२/१२ रन बनाए ।
पर्सा–११ का लागि कप्तान सन्दीप लामिछानेले ४ ओभरमा एक मेडन राख्दै २९ रन खर्चिएर सर्वाधिक तीन विकेट लिए । यस्तै, रञ्जित कुमार, पवन सर्राफ र रुपेश सिंहले दुई/दुई तथा शफिल्लुाह अन्सारीले एक विकेट लिए ।
प्रतियोगितामा पर्सा–११, त्रिभुवन आर्मी, नेपाल पुलिस, एपिएफ क्लब, भारतको वान्डर्स क्लब र यूपी–११ को सहभागिता रहेको छ ।