वीरगंज । जनता समाजवादी पार्टी (जसपा) नेपालका प्रतिनिधि सभा सदस्य प्रदीप यादवले नौ दशक पूरानो वीरगंज कारागार जीर्ण बनेको भन्दै सरकारको ध्यानाकर्षण गराएका छन् ।
बुधबार बसेको प्रतिनिधि सभाको बैठकमा सहभागी हुँदै नेपाल सरकारका पूर्व वन तथा वातावरण मन्त्रीसमेत रहेका यादवले कारागारमा क्षमता भन्दा बढी कैदी भएको हुँदा यथाशीघ्र पुन निर्माण गर्न माग गरेका हुन् । साथै उनले कारागार यातना गृह बनेको इंगित गर्दै भने, ‘कारागार यातना गृह बनेको छ, कारागार सुधार्ने ठाउँ हो की बिगार्ने ठाउँ हो ?’
कम क्षमता हुँदा कैदीलाई कोचाकोच गरेर राख्नुपर्ने बाध्यता रहेको बताउँदै उनले शौचालय जान पनि पालो कुनुपर्ने र त्यही पनि व्यवस्थीत नभएको बताए । उनले भने, ‘९० वर्ष पुरानो कारागार जीर्ण भइसकेको छ । त्याहाँ सुरक्षाकर्मी बस्ने ठाउँ पनि सुरक्षित छैन । कुनै पनि बेला दुर्घटना हुन सक्छ । शौचालय पनि अपर्याप्त छ । पालो कुर्दाकुदै नपाएर कैदीहरु पान्टमै दिशापिसाव गर्न बाध्य छन् ।’
जीर्ण बनेको कारागारको स्थलगत अवलोकन गरेर पुर्ननिर्माणको काम गर्न सांसद यादवले माग गरे ।
यसअघि गत ९ फागुनमा यादवले कारागारको स्थलगत अवलोकन गरेका थिए । जीर्ण बनेका भौतिक संरचना निर्माणका लागि पहल गर्ने प्रतिबद्धता जनाए बमोजिम यादवले प्रतिनिधि सभाको बैठक मार्फत आवाज उठाएका हुन् ।
अनुगमनका क्रममा उनले सुरक्षा र मानव अधिकारका दृष्टिकोणले पनि कारागार पुर्न निर्माण गर्नु पर्ने आवश्यक्ता औँल्याएका थिए । सांसद यादवकाअनुसार जीर्ण बनेका संरचनाका कारण त्याहाँ रहेका कैदीसँगै सुरक्षाकर्मी र कर्मचारी पनि जोखिममा छन् । पूरानो संरचना मर्मतसम्भारमा सरकारले ध्यान नदिँदा जीर्ण बनीरहेको बताउँदै उनले क्षमता भन्दा दोब्बर कैदीबन्दी रहँदा झनै जोखिम बढेको बताएका थिए ।