काठमाडौं,२२ असोज । पश्चिमी न्यूनचापीय प्रणालीसँगै मनसुनी वायुको प्रभाव कायमै रहेकाले देशका अधिकांश भूभागमा बदली र वर्षाको सम्भावना रहेको मौसम पूर्वानुमान महाशाखाले जनाएको छ। महाशाखाका अनुसार आज देशका विभिन्न क्षेत्रमा चट्याङसहित वर्षा तथा हिमाली भूभागमा हिमपातको सम्भावना छ।
हाल बागमती, गण्डकी, कर्णाली र लुम्बिनी प्रदेशका सबै भूभागमा तथा कोशी र सुदूरपश्चिम प्रदेशका हिमाली र पहाडी क्षेत्रमा साधारणतया बदली रहेको छ। मधेस प्रदेशसहित कोशी र सुदूरपश्चिम प्रदेशका तराई क्षेत्रमा भने आंशिक बदली रहेको महाशाखाले जनाएको छ। हाल गण्डकी र लुम्बिनी प्रदेशका केही स्थान तथा बागमती, कर्णाली र सुदूरपश्चिम प्रदेशका एक–दुई स्थानमा चट्याङसहित मध्यम वर्षा भइरहेको छ।
दिउँसो अधिकांश भूभागमा बदली
महाशाखाका अनुसार आज दिउँसो हिमाली र पहाडी भूभागमा साधारणतया बदली रहनेछ। कोशी, मधेस, बागमती र गण्डकी प्रदेशका तराई क्षेत्रमा पनि साधारणतया बदली रहनेछ भने अन्य तराई क्षेत्रमा आंशिक बदली रहने पूर्वानुमान गरिएको छ। कोशी, बागमती र गण्डकी प्रदेशका हिमाली भूभागका थोरै स्थानमा चट्याङसहित मध्यम वर्षा हुने सम्भावना छ। त्यस्तै लुम्बिनी, कर्णाली र सुदूरपश्चिम प्रदेशका हिमाली भूभागका एक–दुई स्थानमा चट्याङसहित हल्का वर्षा र हिमपात हुन सक्ने महाशाखाले जनाएको छ। कोशी, बागमती र गण्डकी प्रदेशका पहाडी भूभागका केही स्थानमा चट्याङसहित मध्यम वर्षाको सम्भावना छ। लुम्बिनी, कर्णाली र सुदूरपश्चिम प्रदेशका पहाडी भूभागका थोरै स्थानमा भने चट्याङ र असिनासहित हल्का वर्षा तथा हिमपात हुन सक्नेछ।
तराईमा पनि वर्षाको सम्भावना
मधेससहित कोशी, बागमती र गण्डकी प्रदेशका तराई भूभागका थोरै स्थानमा चट्याङसहित मध्यम वर्षा हुन सक्ने महाशाखाले जनाएको छ। लुम्बिनी र सुदूरपश्चिम प्रदेशका तराई भूभागका एक–दुई स्थानमा पनि चट्याङसहित मध्यम वर्षाको सम्भावना रहेको छ। यसैबीच बागमती र गण्डकी प्रदेशका पहाडी तथा तराई भूभागका एक–दुई स्थानमा भारी वर्षा समेत हुन सक्ने पूर्वानुमान गरिएको छ।
राति पनि मौसम पूर्णरूपमा नखुल्ने
आज राति कोशी प्रदेशका सबै भूभाग तथा देशका बाँकी हिमाली र पहाडी भूभागमा साधारणतया बदली रहनेछ। तराई भूभागमा भने आंशिक बदली रहने महाशाखाले जनाएको छ। राति कोशी, कर्णाली र सुदूरपश्चिम प्रदेशका हिमाली भूभागका एक–दुई स्थानमा चट्याङसहित मध्यम वर्षा र हिमपात हुन सक्नेछ। देशका पहाडी भूभागका एक–दुई स्थानमा पनि चट्याङसहित हल्का वर्षा र हिमपातको सम्भावना रहेको छ। त्यसैगरी मधेस प्रदेश तथा कोशी प्रदेशका तराई भूभागका थोरै स्थानमा चट्याङसहित मध्यम वर्षा हुन सक्ने महाशाखाले जनाएको छ।
पश्चिमी न्यूनचापीय प्रणाली र मनसुनी वायुको प्रभावका कारण मौसममा देखिएको यो परिवर्तनका बीच विशेषगरी बागमती र गण्डकी प्रदेशका केही भूभागमा भारी वर्षाको समेत सम्भावना रहेकाले सम्बन्धित क्षेत्रको मौसम अवस्थाबारे अद्यावधिक जानकारी लिन महाशाखाले जारी गर्ने पूर्वानुमानमा ध्यान दिनुपर्ने देखिन्छ।