काठमाडौं,१९ भदौ । गृहमन्त्री सुधन गुरुङले विपद् व्यवस्थापन तथा राज्य सञ्चालनमा आफ्नो भौतिक उपस्थितिलाई लिएर भइरहेको आलोचनाको जवाफ दिएका छन्। उनले विपद्को समयमा नेतृत्वको मूल्यांकन भौतिक उपस्थितिभन्दा पनि त्यसबाट प्राप्त हुने परिणामका आधारमा हुनुपर्ने बताएका छन्।
शुक्रबार सामाजिक सञ्जालमार्फत आफ्नो धारणा सार्वजनिक गर्दै गृहमन्त्री गुरुङले विषयगत मन्त्रालयका उच्चपदस्थ अधिकारीहरूको उपस्थितिमा विपद् प्रतिकार्य कमान्ड सेन्टर पूर्ण रूपमा सञ्चालनमा रहेको स्पष्ट पारेका छन्। गृहमन्त्री गुरुङले पुरानो शैलीमा मन्त्रालयको कुर्सीमा बसेर कागजात समात्ने नेतृत्व खोज्नेहरूलाई अहिलेको समयअनुसार सोच्न आग्रह गरेका छन्। उनले त्यस्तो अपेक्षा गर्नेहरूलाई ‘गलत युग’ मा रहेको टिप्पणी गर्दै यसलाई ‘जेनेरेसन ग्याप’ को रूपमा व्याख्या गरेका छन्।
उनले सामाजिक सञ्जालमा लेखेका छन्, ‘यदि पुरानो शैलीमा नेतृत्वलाई मन्त्रालयको कुर्सीमा बसेर कागजात समात्ने कुरासँग जोडेर हेर्नुहुन्छ भने, तपाईं गलत युगमा हुनुहुन्छ (जेनेरेसन ग्याप)।’ गुरुङका अनुसार विषयगत मन्त्रालयका उच्चपदस्थ अधिकारीहरू सम्मिलित विपद् प्रतिकार्य कमान्ड सेन्टरबाट निरन्तर काम भइरहेको छ। उनले अनलाइन माध्यमबाट प्रत्येक चार घण्टामा कमान्ड सञ्चालन तथा रणनीतिक बैठकहरू गरिरहेको जानकारी दिएका छन्। उनले लेखेका छन्, ‘विषयगत मन्त्रालयका उच्चपदस्थ अधिकारीहरूको उपस्थितिमा विपद् प्रतिकार्य कमान्ड सेन्टर पूर्ण रूपमा सञ्चालनमा छ, चिन्ता लिनु पर्दैन। अनलाइनबाट हामी हरेक ४ घण्टामा कमान्ड सञ्चालन र रणनीतिक बैठकहरू गरिरहेका छौँ।’
‘कुर्सीबाट मात्र नेतृत्व गर्दाको परिणाम देशले भोगिसक्यो’
गृहमन्त्री गुरुङले फिल्डको वास्तविक यथार्थ नबुझी कुर्सीबाट मात्रै नेतृत्व गर्ने पुरानो कार्यशैलीको परिणाम देशले वर्षौँदेखि भोग्दै आएको दाबी गरेका छन्। उनका अनुसार अहिले प्रविधिको प्रयोगमार्फत प्रशासनिक काम तथा उद्धार र विपद् प्रतिकार्यलाई थप छिटो र प्रभावकारी बनाउन सकिने अवस्था छ। त्यसैले नेतृत्वको परम्परागत शैलीलाई नै अनिवार्य मान्न नहुने उनको भनाइ छ। उनले पुरानै प्रणालीबाट फरक र उत्कृष्ट परिणामको अपेक्षा गर्दै आफूहरूलाई पुनः त्यही शैली अपनाउन दबाब दिइएकोप्रति आश्चर्य व्यक्त गरेका छन्। ‘उही पुरानै प्रणालीबाट भिन्न र उत्कृष्ट परिणामको आशा गर्दै केही व्यक्तिहरूले अझै पनि हामीलाई त्यही पुरानै शैली अपनाउन दबाब दिएको देख्दा मलाई अचम्म लाग्छ,’ उनले भनेका छन्। गुरुङले डिजिटल माध्यमको प्रयोगबाट प्रशासनिक तथा उद्धारका कामहरू टेबल पछाडि बसेर गरिने परम्परागत प्रक्रियाभन्दा धेरै छिटो र प्रभावकारी रूपमा अघि बढिरहेको दाबी गरेका छन्। आफ्नो भौतिक उपस्थिति कहाँ छ भन्ने विषयमा केन्द्रित हुनुभन्दा कामको परिणाममा ध्यान दिन उनले आलोचकहरूलाई आग्रह गरेका छन्। ‘म कहाँ बसेको छु भनेर चिन्ता गर्नुभन्दा परिणाममा ध्यान दिन अनुरोध गर्न चाहन्छु,’ गृहमन्त्री गुरुङले भनेका छन्।
भोटेकोशी बाढीपछि कार्यशैलीमाथि प्रश्न
गृहमन्त्री गुरुङको यो स्पष्टीकरण रसुवाको भोटेकोशी बाढी र त्यसपछिको उद्धार कार्यमा उनको कार्यशैली तथा प्रत्यक्ष उपस्थितिलाई लिएर उठेका प्रश्नपछि आएको हो। विपद्का बेला गृहमन्त्रीको भौतिक उपस्थिति कस्तो हुनुपर्छ भन्ने विषयमा कतिपय राजनीतिक वृत्त तथा सामाजिक सञ्जालमा प्रश्न उठिरहेका बेला गुरुङले आफ्नो नेतृत्व शैलीबारे धारणा सार्वजनिक गरेका हुन्।
उनले भनेजस्तै विपद् प्रतिकार्य कमान्ड सेन्टरबाट विषयगत मन्त्रालयका उच्चपदस्थ अधिकारीहरूको समन्वयमा काम भइरहेको र नियमित रणनीतिक बैठकहरू सञ्चालन भइरहेको अवस्थामा नेतृत्वको शैलीभन्दा प्रतिकार्यको प्रभावकारिता तथा परिणामलाई प्राथमिकतामा राख्नुपर्ने उनको तर्क छ।
गुरुङले प्रविधिमा आधारित समन्वय र डिजिटल माध्यमको प्रयोगमार्फत विपद् व्यवस्थापनमा छिटो निर्णय, निरन्तर कमान्ड तथा प्रभावकारी समन्वय गर्न सकिने धारणा अघि सारेका छन्।