बारा,१८ भदौ । जिल्ला प्रहरी कार्यालय बाराले प्रहरी नायव निरीक्षक (प्रनानि) मनोज साह सोनारलाई २०८३ साल साउन महिनाको ‘उत्कृष्ट प्रहरी’ (बेस्ट पुलिस अफ द मन्थ) घोषणा गरेको छ।
कार्यसम्पादनमा देखाएको इमानदारी, अनुशासन, जिम्मेवारीप्रतिको प्रतिबद्धता तथा प्रहरी सेवामा पुर्याएको योगदानको मूल्याङ्कन गर्दै जिल्ला प्रहरी कार्यालय बाराले प्रनानि सोनारलाई साउन महिनाको उत्कृष्ट प्रहरीका रूपमा छनोट गरेको हो। जिल्ला प्रहरी कार्यालय बाराका प्रमुख प्रहरी उपरीक्षक (एसपी) नरेन्द्र कुँवरले प्रनानि सोनारलाई उत्कृष्ट प्रहरी घोषणा गर्दै प्रशंसापत्र तथा पुरस्कार प्रदान गरेका छन्। उत्कृष्ट प्रहरी घोषणा भएपछि एसपी कुँवरले सोनारलाई बधाई तथा शुभकामना दिँदै आगामी दिनमा समेत आफ्नो जिम्मेवारीप्रति थप प्रतिबद्ध, अनुशासित र कर्तव्यनिष्ठ भएर कार्यसम्पादन गर्न प्रोत्साहित गरेका छन्।
जिल्ला प्रहरी कार्यालय बाराको आर्थिक प्रशासन शाखामा दरबन्दी रहेका प्रनानि सोनार हाल प्रहरी चौकी विश्रामपुर–मुसहर्वामा कार्यरत छन्। कार्यक्षेत्रमा उनले निर्वाह गरेको जिम्मेवारी, देखाएको लगनशीलता तथा प्रहरी सेवाप्रतिको समर्पणलाई आधार बनाएर उनलाई महिनाको उत्कृष्ट प्रहरीका रूपमा छनोट गरिएको जिल्ला प्रहरी कार्यालयले जनाएको छ।
प्रहरी कार्यालयका अनुसार संगठनबाट प्राप्त जिम्मेवारीलाई प्रनानि सोनारले पूर्णरूपमा लगनशील र कर्तव्यनिष्ठ भई निर्वाह गर्दै आएका छन्। साथै, समाजमा शान्ति–सुरक्षा कायम गर्न, अपराध नियन्त्रणमा प्रभावकारी भूमिका निर्वाह गर्न तथा सर्वसाधारण नागरिकलाई सुरक्षाको अनुभूति दिलाउन उनले महत्वपूर्ण योगदान पुर्याएको प्रशंसापत्रमा उल्लेख गरिएको छ। प्रहरी सेवामा जिम्मेवारीपूर्वक खटिएर कार्यसम्पादनमा उत्कृष्टता देखाउने प्रहरी कर्मचारीलाई प्रोत्साहित गर्ने उद्देश्यले प्रदान गरिने सम्मानले प्रहरी कर्मचारीको मनोबल उच्च बनाउन तथा आगामी दिनमा थप जिम्मेवार भएर सेवा प्रवाह गर्न प्रेरणा मिल्ने अपेक्षा गरिएको छ।
उत्कृष्ट प्रहरी घोषित प्रनानि सोनारलाई एसपी कुँवरले आगामी दिनमा पनि प्रहरी संगठनको जिम्मेवारीलाई उच्च प्राथमिकतामा राख्दै नागरिकको सुरक्षा, शान्ति–सुव्यवस्था तथा अपराध नियन्त्रणका क्षेत्रमा थप प्रभावकारी ढङ्गले काम गर्न शुभकामना दिएका छन्।