वीरगंज,०२ भदौ । मकवानपुरको भीमफेदी गाउँपालिका–६, जुरिखेतमा स्कार्पियो दुर्घटना हुँदा उच्च अदालत जनकपुरको अस्थायी इजलास वीरगञ्जका न्यायाधीश गोकर्ण डाँगीसहित ६ जना घाइते भएका छन् । घाइतेमध्ये न्यायाधीश डाँगीसहित चार जनालाई नेपाली सेनाको हेलिकोप्टरमार्फत थप उपचारका लागि काठमाडौं पठाइएको छ ।
काठमाडौंबाट हेटौँडातर्फ आउँदै गरेको प्रदेश–३–००२ झ ५१८३ नम्बरको स्कार्पियो भीमफेदी–६ स्थित जुरिखेतमा दुर्घटनामा परेको हो । दुर्घटनामा न्यायाधीश डाँगीसहित रजिष्ट्रार तारादत्त बडु, उनकी पत्नी लक्ष्मी बडु, छोरा रितेन्द्र बडु, दिदी रिता बडु र चालक छुनिलाल चौधरी घाइते भएका हुन् ।
दुर्घटनामा घाइते हुनेमा मुख्य न्यायाधीश डाँगी ५७ वर्ष, बैतडीको दशरथचन्द नगरपालिका–७, सुर्कालका रजिष्ट्रार तारादत्त बडु ५१ वर्ष, उनकी पत्नी लक्ष्मी बडु ४९ वर्ष, छोरा रितेन्द्र बडु २५ वर्ष, दिदी रिता बडु ३१ वर्ष र दाङको राप्ती गाउँपालिका–८ का चालक छुनिलाल चौधरी ३२ वर्ष रहेका छन् ।
घाइतेमध्ये रजिष्ट्रार बडु र चालक चौधरीबाहेक न्यायाधीश डाँगीसहित चार जनालाई नेपाली सेनाको हेलिकोप्टरमार्फत काठमाडौंस्थित छाउनी अस्पताल पठाइएको मकवानपुरका प्रहरी नायब उपरीक्षक (डीएसपी) माधवप्रसाद काफ्लेले जानकारी दिए । उपचारका लागि काठमाडौं पठाइएका चारै जनालाई थप स्वास्थ्य उपचार र आवश्यक चिकित्सकीय निगरानीका लागि छाउनी अस्पताल पुर्याइएको हो ।
यता, दुर्घटनामा घाइते भएका रजिष्ट्रार तारादत्त बडु र चालक छुनिलाल चौधरीको भने हेटौँडा अस्पतालमा उपचार भइरहेको प्रहरीले जनाएको छ । जुरिखेत क्षेत्रमा काठमाडौंबाट हेटौँडातर्फ आउँदै गरेको स्कार्पियो दुर्घटनामा परेपछि घटनाबारे प्रहरीले आवश्यक अनुसन्धान तथा दुर्घटनाको अवस्थाबारे थप विवरण संकलन गरिरहेको जनाएको छ ।