वीरगंज(पर्सा),१३ फागुन । नेपाल कम्युनिष्ट पार्टी (एमाले) पर्सा निर्वाचन क्षेत्र नं. २ की प्रतिनिधिसभा सदस्य उम्मेदवार रीमा यादवले बुधबार वीरगंज महानगरपालिका–१९ अन्तर्गत बर्वा र बिन्द्वासानी टोलमा घरदैलो कार्यक्रम सम्पन्न गरेकी छन्।
घरदैलोका क्रममा उम्मेदवार यादवले स्थानीय मतदातासँग प्रत्यक्ष भेटघाट गर्दै उनीहरूका गुनासा सुन्ने अवसर लिइन्। उनले विकास, रोजगारी, शिक्षा, स्वास्थ्य र पूर्वाधार निर्माण क्षेत्रका कामलाई आफ्नो मुख्य प्राथमिकता रहने प्रतिबद्धता व्यक्त गरिन्। यादवले भनिन्, “हामी पर्सा–२ लाई समृद्ध, व्यवस्थित र अवसरयुक्त क्षेत्रका रूपमा अघि बढाउने योजना बनाएका छौं। आगामी निर्वाचनमा मतदाताको सहयोग र विश्वास आवश्यक छ, र म जनताको सेवा गर्ने अवसर पाउँदा यस क्षेत्रमा वास्तविक परिवर्तन ल्याउने प्रयास गर्नेछु।”
उम्मेदवार यादवले मतदातालाई आश्वासन दिइन् कि उनी झुटा वाचा गर्ने राजनीतिमा विश्वास गर्दिनन्। उनको भनाइ अनुसार, विकासका कामहरू केवल जीतपछि मात्र पूर्ण रूपमा लागू गरिने छन् र जनताको आवश्यकता र हितलाई प्राथमिकतामा राखिनेछ। कार्यक्रममा बिचारी यादव, प्रेम पटेल, लियाकत अली, अजय साह लगायत स्थानीय नेता तथा कार्यकर्ताहरूको उल्लेखनीय उपस्थिति रहेको थियो। सहभागीहरूले घरघर पुगेर पार्टीका नीति, कार्यक्रम र भावी योजनाबारे मतदातालाई जानकारी गराए। टोलीले स्थानीय बासिन्दासँग प्रत्यक्ष संवाद गर्दै क्षेत्रको समस्या बुझ्ने र समाधानका उपाय प्रस्तुत गर्ने प्रयास गरे।
स्थानीय बासिन्दाले पनि कार्यक्रममा उत्साहजनक सहभागिता जनाए। उनीहरूले क्षेत्रको समृद्धि र व्यवस्थित विकासका लागि सक्षम, प्रतिबद्ध र विकासमुखी नेतृत्व आवश्यक रहेको औंल्याए। कार्यक्रमको दौरान युवा मतदाताहरूले पनि उम्मेदवार यादवलाई स्वागत गर्दै उनलाई जिताउन पूर्ण सहयोग गर्ने प्रतिवद्धता व्यक्त गरेका थिए। यो घरदैलो कार्यक्रममा मतदातासँग प्रत्यक्ष संवाद र योजना प्रस्तुतिको माध्यमबाट उम्मेदवार यादवले आफ्नो अभियानलाई थप मजबुत बनाउने लक्ष्य राखेकी छन्। यसले आगामी निर्वाचनमा पर्सा–२ का मतदातासँग उनीहरूको पहुँच र विश्वासलाई सुदृढ पार्ने अपेक्षा गरिएको छ।