वीरगंज,२० माघ । पर्सा क्षेत्र नम्बर–१ का नेकपा एमालेका उम्मेदवार प्रदीप यादवले जनताको सुखदुःखमा सधैं साथ दिने नेतालाई मात्रै मतदान गर्न मतदातासँग आग्रह गरेका छन्।
मंगलबार वीरगंजमा आयोजित नेकपा एमाले शुभेच्छुक पर्सा जिल्ला स्तरीय बृहत् कार्यकर्ता भेलालाई सम्बोधन गर्दै पूर्वमन्त्रीसमेत रहेका यादवले चुनावका बेला मात्र देखिने र अरु समयमा जनताबाट टाढा रहने नेताहरू पुनः उम्मेदवार बनेर आएको टिप्पणी गरे। त्यस्ता नेताहरूबाट जनताले सजग रहनु आवश्यक रहेको उनको भनाइ थियो।
“जनताको हरेक सुखदुःख, आपत–विपतमा निरन्तर साथ दिने उम्मेदवारलाई नै भोट दिएर जिताउनुस्,” यादवले भने। उनले यसपटकको निर्वाचनमा पर्साका चारै निर्वाचन क्षेत्रमा जनताको सेवामा खटिने उम्मेदवारलाई मैदानमा उतारेकाले एमालेले चारै क्षेत्रमा अत्यधिक बहुमतका साथ जित हासिल गर्ने दाबीसमेत गरे।
यादवले पर्सा जिल्लाका विभिन्न पालिकामा पानीको चरम अभाव हुँदा आफू खानेपानी मन्त्रीको हैसियतमा जनताको घर–घरमा पुगेर सेवा गरेको स्मरण गराए। उनले त्यस बेला अहिले उम्मेदवार बनेर आएका धेरै नेताहरू जनताको दैलोमा नदेखिएको दाबी गरे।
“वीरगंजसहित पर्साका पालिकामा पानीको हाहाकार हुँदा म मन्त्रीको रूपमा जनताको घरमा पुगेँ, पानी खुवाएँ,” उनले भने, “त्यसैले फागुन २१ गतेको मतदानमा जनताले दुख र विपतमा साथ दिने नेता चुन्नुहुनेछ भन्नेमा म विश्वस्त छु।”
उनले आगामी निर्वाचनमा एमालेले जित हासिल गर्दै संविधानको संरक्षण र देशको स्थायित्व सुनिश्चित गर्ने दाबीसमेत गरे।