काठमाडौं, १६ माघ – गत भदौ २३ र २४ मा भएको जेन-जी आन्दोलनका क्रममा शहीद भएका युवाहरूको सम्झनामा दीप प्रज्वलन कार्यक्रम आयोजना गरिएको छ।
शुक्रबार नयाँ बानेश्वरस्थित संसद् भवन अगाडि शहीदहरूको सम्झनामा आयोजित कार्यक्रममा शहीद परिवार, घाइते परिवारका सदस्यहरू तथा विभिन्न युवाहरूले सहभागिता जनाएका थिए। सहभागीहरूले शहीदहरूको बलिदानलाई सम्झदै उनीहरूको सपना पूरा गर्न प्रतिबद्धता जनाएका थिए।
कार्यक्रममा उपस्थितहरूले जेन-जी आन्दोलनका क्रममा संसद् भवन र आसपासका क्षेत्रमा शहीद भएका युवाहरूको योगदान र बलिदानलाई उच्च मूल्याङ्कन गर्दै, सामाजिक न्याय र समावेशी लोकतान्त्रिक संस्कार स्थापना गर्नुपर्नेमा जोड दिएका थिए।
दीप प्रज्वलनको क्रममा सहभागीहरूले शहीदको सम्झना गर्दै राष्ट्रिय एकता, युवा सशक्तिकरण र देशको प्रगतिका लागि निरन्तर सक्रिय रहने प्रतिबद्धता व्यक्त गरेका थिए।
शहीद दिवसले जेन-जी आन्दोलनका वीर युवा र उनीहरूको बलिदानलाई स्मरण गराउन मात्र नभई वर्तमान र आगामी पुस्तालाई सामाजिक उत्तरदायित्व र राष्ट्रिय चेतनामा जागरूक बनाउने अवसर पनि प्रदान गरेको आयोजकहरूले बताएका छन्।