पाँचथर,१२ जेष्ठ । नेपाली कांग्रेसका नेता डा. शेखर कोइरालाले पार्टीका कार्यकर्ताले नेताको झोला मात्र बोकेर नहुने बताएका छन् । आमसभा तथा पार्टी प्रवेश कार्यक्रमलाई सम्बोधन गर्न सोमबार पाँचथरको फालेलुङ पुगेका नेता कोइरालाले कांग्रेस कार्यकर्ताहरू स्वाभिमानी बन्नु पर्ने बताएका हुन् ।
‘नेपाली कांग्रेसका कार्यकर्ताहरूले नेताको झोला बोक्ने र उनीहरूको पछि कुदेर मात्र हुँदैन’, कोइरालाले भने ‘कार्यकर्ताहरू स्वाभिमानी बन्नुपर्छ । आफूलाई आफैंले सक्षम नेतृत्वको रूपमा स्थापित गर्नुपर्छ । नेता खुशी पार्न हैन जनतालाई खुशी बनाउने काम कार्यकर्ताले गर्नुपर्छ ।’
नेपाली कांग्रेस फालेलुङ गाँउपालिकाले आयोजना गरेको कार्यक्रमलाई सम्बोधन गर्दै उनले प्रधानमन्त्री केपी ओलीले जथाभावी बोल्दै हिँडेको आरोप पनि लगाए । ‘ओलीजीले जथाभावी बोलिरहनु भएको छ’, उनले भने, ‘प्रधानमन्त्रीले एमालेका कार्यकर्तालाई काठमाडौं कब्जा गर्न निर्देशन दिन मिल्दैन ।’ प्रधानमन्त्री ओलीले पार्टीका कार्यकर्तालाई अनावश्यक उक्साएको कोइरालाको टिप्पणी छ ।
आइतबार नेकपा एमाले बागमती प्रदेश कमिटीले आयोजना गरेको कार्यक्रमलाई सम्बोधन गर्ने क्रममा ओलीले जेठ १५ गते काठमाडौंलाई एमालेको कब्जामा राख्न निर्देशन दिएका थिए । सोही दिन राजावादीहरूले पनि काठमाडौं केन्द्रित आन्दोलनको घोषणा गरेका छन् ।