काठमाडौं,०४ जेष्ठ । अमेरिकाका मिसौरी र केन्टुकी राज्यहरूमा आएको आँधीका कारण कम्तीमा २५ जनाको मृत्यु भएको छ। यो प्रकोपले दुबै राज्यमा दुई लाखभन्दा बढी मानिसहरूलाई विद्युत् सेवा बिना छोडेको छ।
केन्टुकीका गभर्नर यान्डी बेशरका अनुसार, आँधीका कारण केन्टुकीमा १८ जनाको मृत्यु भएको छ भने मिसौरीमा सात जनाको ज्यान गएको छ। स्थानीय अधिकारीहरूले मृतकको संख्या अझ बढ्न सक्ने आशंका व्यक्त गरेका छन्।
केन्टुकीको दक्षिणपूर्वी भागमा पर्ने लरेल काउन्टीमा शनिबार बिहान आँधी गएको थियो। मिसौरीका अधिकारीहरूले शुक्रबार आएको आँधीले पाँच हजारभन्दा बढी भवनमा क्षति पुगेको जानकारी दिएका छन्। घरका छाना उडेको र विद्युत् सेवा अवरुद्ध भएको छ।
सेन्ट लुइस क्षेत्रमा करिब एक लाख घरहरू विद्युत् कटौतीका कारण प्रभावित भएका छन्। हावाहुरीले धेरै प्रभावित क्षेत्रहरूमा अग्नी नियन्त्रण विभागले घरघरमा निरीक्षण गरिरहेको जनाएको छ।