वीरगंज,२४ जेष्ठ । राष्ट्रिय स्वतन्त्र पार्टी (रास्वपा) बाराका कार्यकर्ताहरूले काठमाडाैंस्थित पार्टीकाे केन्द्रिय कार्यालयमा धर्ना दिएका छन् । कलैया उपमहानगरपालिका अधिवेशनपछि गरिएको उपनिर्वाचन खारेज गर्न माग गर्दै रास्वपा कार्यकर्ताहरु काठमाडाैं पुगेका हुन् । उनीहरूले अधिवेशनबाट निर्वाचित नेतृत्वलाई मान्यता नदिई पुनः निर्वाचन गराइनु पार्टी विधान र लोकतान्त्रिक प्रक्रियाविपरीत भएको बताएका छन् ।
कार्यकर्ताहरूका अनुसार २०८३ जेठ १७ गते सम्पन्न कलैया उपमहानगरपालिका अधिवेशनमा उमाशंकर राैनियार १२४ मत प्राप्त गर्दै सभापतिमा निर्वाचित भएका थिए । निर्वाचन परिणाम घोषणा भएपछि उनको शपथग्रहणसमेत सम्पन्न भएको थियो । तर त्यसको दुई दिनपछि ह्वाट्सएप समूहमार्फत पुनः उपनिर्वाचन हुने सूचना सार्वजनिक गरिएको भन्दै कार्यकर्ताहरूले आपत्ति जनाएका छन् ।
रास्वपा कार्यकर्ता धिराज पटेलका अनुसार उक्त सूचना कुनै आधिकारिक पत्र, हस्ताक्षर वा जिम्मेवार पदाधिकारीको नामबिनाको साधारण कागजमा सार्वजनिक गरिएको थियो । उनले निर्वाचन सम्पन्न भइसकेपछि ‘५० प्रतिशतभन्दा बढी मत प्राप्त नभएको’ आधार देखाउँदै पुनः निर्वाचन गराउने निर्णय गरिएको दाबी गरिएको भए पनि सो विषय निर्वाचनकै दिन किन नउठाइएको भन्ने प्रश्न गरेका छन् ।
पटेलले पार्टीका निर्वाचन प्रतिनिधि तथा नेतृत्वले विधानको सही व्याख्या नगरेको आरोप लगाउँदै विजयी घोषणा गरी माला र अबिर लगाइसकेपछि पुनः निर्वाचन गराउनु अनुचित भएको बताए । उनले उपनिर्वाचन सीमित प्रतिनिधिबीच मात्र गराइएको र अधिकांश वडा प्रतिनिधिलाई सहभागी हुन नदिइएको आरोपसमेत लगाए ।
कार्यकर्ताहरूले पार्टी नेतृत्वसँग उपनिर्वाचनको आधार सार्वजनिक गर्न, निर्णय प्रक्रियामा पारदर्शिता कायम गर्न तथा निष्पक्ष ढंगले समस्या समाधान गर्न माग गरेका छन् । साथै उनीहरूले परिवर्तनको अपेक्षासहित पार्टीमा आबद्ध भएका समर्थकहरू पछिल्लो घटनाक्रमबाट निराश बनेको बताएका छन् ।