वीरगंज,३० चैत । सशस्त्र प्रहरी बलको गाडीले मोटरसाइकललाई ठक्कर दिँदा एक जना घाइते भएका छन्।
सोमबार बिहान वीरगंज महानगरपालिका वडा नं. २२ जगरनाथपुर चोकभन्दा करिब १०० मिटर अगाडि सडकमा सशस्त्र प्रहरीको ना. १ झ १५३१ नम्बरको स्कार्पियो गाडीले प्रदेश २–००१–प १६२९ नम्बरको प्लाटिना मोटरसाइकललाई ठक्कर दिएको हो।
ठक्करबाट मोटरसाइकल चालक वीरगंज–३२ चोर्नी निवासी दिपेन्द्र श्रीवास्तव घाइते भएका छन् । सशस्त्र प्रहरी बल नेपाल नं. १३ गण, पर्साका सूचना अधिकारी सशस्त्र प्रहरी नायब उपरीक्षक मोहन निरौलाका अनुसार घाइते श्रीवास्तवको वीरगंजस्थित नारायणी अस्पतालमा उपचार भइरहेको छ।
स्थानीयका अनुसार ड्राइपोर्टबाट परवानीपुरतर्फ जाँदै गरेको मोटरसाइकललाई विपरीत दिशाबाट आएको सशस्त्र प्रहरीको गाडीले ठक्कर दिएको हो। चिनी र तेल लोड गरिएको मोटरसाइकललाई परवानीपुरबाट ड्राइपाेर्ट तर्फ विपरित लेनमा आइरहेकाे सशस्त्रकाे गाडीले जानाजान घुमाएर ठक्कर दिएको स्थानीय प्रत्यक्षदर्शीले आरोप लगाएका छन्।
घटनापछि स्थानीयले पर्साका प्रमुख जिल्ला अधिकारी भोला दाहाललाई जानकारी गराएपछि वडा प्रहरी कार्यालय श्रीपुरबाट वरिष्ठ प्रहरी नायब निरीक्षक (सई) धिरेन्द्र थपलियाको नेतृत्वमा प्रहरी टोली घटनास्थल पुगेको थियो। तर, स्थानीयले घटना विवरण दिँदा सई थपलियाले उल्टै थर्काएको आरोप समेत लगाएका छन्।
यस विषयमा वडा प्रहरी कार्यालय श्रीपुरका प्रहरी निरिक्षक नविन थापा मगर विदामा भएकाे कारण सई थपलियासँग बुझ्न फोनमार्फत सम्पर्क गर्न खोजिए पनि सम्पर्क हुन सकेन।