वीरगंज,०३ चतै । जिल्ला प्रहरी कार्यालय धनुषाले प्रहरी निरीक्षक मनोज कुमार यादवलाई २०८२ साल फागुन महिनाको ‘पुलिस अफ द मन्थ’ घोषणा गरेको छ।
मधेश प्रदेश प्रहरी कार्यालय जनकपुर अन्तर्गत कार्यरत यादवले फागुन महिनाभित्र विभिन्न महत्वपूर्ण जिम्मेवारी कुशलतापूर्वक सम्पन्न गरेको आधारमा उनलाई उत्कृष्ट प्रहरीको रूपमा छनोट गरिएको हो।
उनले मिति २०८२ फागुन १९ गते सम्पन्न मिथिला माध्यमिकी अन्तगृह परिक्रमा मेला तथा २० गतेको होली पर्वलाई शान्तिपूर्ण रूपमा सम्पन्न गराउन सुरक्षा योजना तयार गरी प्रभावकारी रूपमा कार्यान्वयन गरेका थिए। साथै, फागुन २१ गते सम्पन्न प्रतिनिधि सभा सदस्य निर्वाचन २०८२ लाई स्वच्छ, निष्पक्ष र भयरहित वातावरणमा सम्पन्न गराउन उनले महत्वपूर्ण भूमिका निर्वाह गरेका थिए।
निर्वाचन अवधिभर यादवले जिल्ला प्रहरी कार्यालय धनुषाको निर्वाचन सेलमार्फत विस्तृत सुरक्षा योजना तयार गरी कार्यान्वयनमा ल्याएका थिए। उनले राजनीतिक दलका सभा, जुलुस तथा प्रचार–प्रसार कार्यक्रमहरूलाई व्यवस्थित बनाउन प्रहरी परिचालन गर्दै स्वयं कमाण्डरको रूपमा नेतृत्व गरेका थिए।
त्यसैगरी, मतदानस्थल तथा मतदान केन्द्रहरूको सुरक्षा अवस्थाको विश्लेषण गरी आवश्यक प्रहरी जनशक्ति परिचालन, मोबाइल गस्ती, चेकजाँच तथा निगरानीलाई तीव्र बनाउने कार्यमा उनको सक्रियता देखिएको थियो। उनले राजनीतिक दल, उम्मेदवार तथा सरोकारवाला निकायसँग समन्वय गर्दै निर्वाचन आचारसंहिता पालना गराउन पनि महत्वपूर्ण भूमिका खेलेका थिए।
मतदानका दिन मोबाइल कमाण्डरका रूपमा खटिएका यादवले मतदान प्रक्रिया सुरक्षित र व्यवस्थित रूपमा सञ्चालन गराउन योगदान दिएका थिए। मतदान सम्पन्न भएपछि मतपेटिका संकलन तथा मतगणना स्थलको सुरक्षा व्यवस्थापनमा समेत उनले प्रभावकारी भूमिका निर्वाह गरेका थिए।
जिल्ला प्रहरी कार्यालय धनुषाका प्रमुख प्रहरी उपरीक्षक रुगम बहादुर कुँवरले यादवको लगनशीलता, कर्तव्यनिष्ठा र व्यावसायिक दक्षताको उच्च प्रशंसा गर्दै उनलाई ‘पुलिस अफ द मन्थ’ घोषणा गरिएको जानकारी दिएका छन्।