वीरगंज (पर्सा), १८ चैत । वीरगंजमा अवैध तरिकाले कल बाइपास गरि नेटवर्किङ्ग धन्दा चलाउने तीनजना चिनियाँ नागरिकलाई पर्सा प्रहरीले पक्राउ गरेको छ । पक्राउ पर्नेमा चाइनाको हुनान बस्ने ३३ वर्षीय लिउ गुई काई, चाइनाको हुबेई बस्ने २६ वर्षीय वाङ्ग बोहान र सोही ठाउँ बस्ने ३६ वर्षीय स्याङ्ग स्यो रहेका छन् ।
निजहरुले वीरगंज महानगरपालिका वडा नं. १५ लक्ष्मणवा स्थित एक घरमा अवैध तरिकाले कल सेन्टर संचालन गरि नेटवर्किङ्ग धन्दा चलाई नेपाली लगायत विभिन्न देशका व्यक्तिहरुलाई ठगी गरि रहेको आरोपमा पर्सा प्रहरीले पक्राउ गरेको हो । विशेष सूचनाको आधारमा पर्साका प्रहरी उपरीक्षक कुमोध ढुङ्गेलको नेतृत्वमा खटिएको टोलीले आइतबार साँझ ति घरमा छापामारी गरि निजहरुलाई नियन्त्रणमा लिएको हो भने उनीहरुको साथबाटै ठुलै संख्यामा कम्प्यटुर, मोबाइल, सिसिटिभि जस्ता इलेक्ट्रोनिक्स सामानहरु बरामद भएको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक कुमार विक्रम थापाले जानकारी दिए ।
उनीहरुले अनलाइन लट्री, अनलाइन सपिङ्ग जस्ता विभिन्न प्रकारको प्रलोभन देखाई नेपाली तथा विदेशी नागरिकहरुलाई ठगी गरि रहेको विशेष सूचनाको आधारमा जिल्ला प्रहरी कार्यालय पर्साको इन्टिलिजेन्स टिमबाट त्यस्ता गतिविधि निगरानी गर्ने क्रममा चैत १७ गते अन्दाजी करिब ३ बजेको समयमा लक्ष्मणवा स्थित नन्दु पटेलको घरमा कानूनी रीतपुर्याई खानतलासी गर्दा ठूलै परिमाणमा कम्प्यटुर डेक्सटप, ल्यापटप, मोबाइल जस्ता विद्युतीय उपकरणहरु बरामद भएको पर्साका प्रहरी उपरीक्षक कुमोध ढुङ्गेलले जानकारी दिए ।
छापामारीको क्रममा कम्प्युटर डेक्सटप सिपियू १२० थान, मनिटर ११८ थान, पासपोर्ट ३ थान, मोबाइल ३५ थान, भारतीय जियो सिमकार्ड १३ थान, ल्यापटप ४ थान, प्रिन्टर १ थान, विभिन्न बैंकहरुका एटिएम कार्ड ३ थान, किबोर्ड २६ थान, इन्टरनेट स्वीच ५ थान, वाईफाई राउटर २ थान, मिनी इन्भर्टर २ थान, विभिन्न देशका मुद्राहरु (मलेसियन ३७ रिंगिट, नेपाली ५०० को दरका नोट ८६ थान गरि २३ हजार), कम्बोडियन ३५०० तथा बि.आ. ०१ सिएक्स ५७९२ नम्बरको आईट्वान्टी कार एवं प्र. २-०३-०११ प १३६७ नम्बरको मोटरसाइकल बरामद भएको प्रहरी उपरीक्षक ढुङ्गेलले जानकारी दिए ।
बरामद गरिएको सामान सहित पक्राउ परेका तिनैजना चिनियाँ नागरिकलाई जिल्ला प्रहरी कार्यालय पर्साको हिरासतमा राखेर थप अनुसन्धान भइरहेको उनको भनाई छ ।
