वीरगंज,२९ साउन । जिल्ला प्रहरी कार्यालय पर्सामा हालै सरुवा भई आएका प्रहरी उपरीक्षक (एसपी) पवन भट्टराईले जिल्लामा शान्ति सुरक्षा कायम गर्नुका साथै अपराध नियन्त्रण र सीमा क्षेत्रमा हुने तस्करी नियन्त्रणलाई आफ्नो प्रमुख प्राथमिकतामा राखेको बताएका छन्।
शुक्रबार जिल्ला प्रहरी कार्यालय पर्साको सभाहलमा स्थानीय सञ्चारकर्मीसँग आयोजित परिचयात्मक तथा अन्तरक्रिया कार्यक्रममा बोल्दै एसपी भट्टराईले प्रहरी सेवालाई थप जनमैत्री, विश्वसनीय, पारदर्शी र जवाफदेही बनाउने प्रतिबद्धता व्यक्त गरे। उनले नागरिकलाई सहज र प्रभावकारी सेवा प्रदान गर्दै शान्ति सुरक्षा, अमनचयन, सामाजिक सद्भाव तथा विधिको शासन कायम गर्न प्रहरी प्रशासन सक्रिय रहने बताए।
सीमा क्षेत्रमा हुने तस्करीसहितका गैरकानुनी तथा आपराधिक गतिविधि नियन्त्रणमा विशेष ध्यान दिइने उल्लेख गर्दै एसपी भट्टराईले अपराधरहित समाज निर्माणका लागि प्रहरीको एक्लो प्रयास मात्र पर्याप्त नहुने बताए। अपराध नियन्त्रण तथा सामाजिक सुरक्षा मजबुत बनाउन सञ्चारकर्मी, स्थानीय नागरिक र समाजका सबै पक्षसँग निरन्तर सहकार्य र समन्वय आवश्यक रहेको उनको भनाइ थियो।
प्रहरीप्रति नागरिकको विश्वास अझ मजबुत बनाउन सूचना आदानप्रदान र नागरिकसँगको सहकार्यलाई प्रभावकारी बनाउने बताउँदै एसपी भट्टराईले प्रहरी संगठनलाई नागरिकप्रति उत्तरदायी र जवाफदेही बनाउँदै कानुन कार्यान्वयनमा निष्पक्षता कायम गर्ने प्रतिबद्धता जनाए।
अन्तरक्रियामा सहभागी सञ्चारकर्मीहरूले प्रहरी प्रशासनको कामकारबाही थप पारदर्शी, प्रभावकारी र जनउत्तरदायी हुनुपर्नेमा जोड दिएका थिए। उनीहरूले हिंसामा परेका तथा न्यायको खोजीमा प्रहरीसमक्ष आउने पीडितलाई थप पीडा दिनेभन्दा संवेदनशील र मानवीय व्यवहार गर्न प्रहरी प्रशासनलाई आग्रह गरे।
सञ्चारकर्मीहरूले विगतमा सूचना सङ्कलन तथा समाचार सम्प्रेषणका क्रममा पत्रकारहरूलाई प्रहरी प्रशासनबाट अनावश्यक दुःख दिने तथा असहज परिस्थिति सिर्जना हुने गरेको गुनासोसमेत गरेका थिए। आगामी दिनमा त्यस्ता गतिविधि दोहोरिन नदिन तथा प्रहरी र सञ्चारकर्मीबीच सहकार्य र विश्वासको वातावरण बनाउन उनीहरूले आग्रह गरे।
कार्यक्रममा प्रहरी र सञ्चारकर्मीबीचको समन्वयलाई थप बलियो बनाउने, सूचनाको सहज आदानप्रदान गर्ने तथा नागरिकका समस्या र गुनासोलाई प्रभावकारी रूपमा सम्बोधन गर्ने विषयमा समेत छलफल भएको थियो।
अन्तरक्रिया कार्यक्रममा प्रहरी नायब उपरीक्षकद्वय चक्रबहादुर मल्ल र राजु कार्की, नेपाल पत्रकार महासंघका केन्द्रीय लेखा समिति संयोजक केसी लामिछाने, मधेश प्रदेश अध्यक्ष श्याम बन्जारा, सचिव दीपक गौतम, पर्सा अध्यक्ष ओमप्रकाश खनाल, पूर्वकेन्द्रीय सचिव दीपेन्द्र चौहानलगायत प्रहरी अधिकृत तथा सञ्चारकर्मीहरूको सहभागिता रहेको थियो।