वीरगंज,२८ माघ । पर्सा निर्वाचन क्षेत्र नम्बर २ अन्तर्गत वीरगञ्ज महानगरपालिका–२७ कुहडीमा बुधवार नेकपा (एमाले) को वडा स्तरीय अगुवा कार्यकर्ता भेला सम्पन्न भएको छ। प्रमोद साह तेलीको अध्यक्षतामा आयोजित कार्यक्रममा एमालेकी प्रतिनिधिसभा सदस्य उम्मेदवार रिमा कुमारी यादवले क्षेत्रको समग्र विकासका लागि आफ्नो योजना र प्रतिबद्धता सार्वजनिक गरेकी छन्।
भेलामा नेपाली कांग्रेस, राष्ट्रिय स्वतन्त्र पार्टी (रास्वपा) र जनता समाजवादी पार्टी (जसपा) नेपालका दर्जनौँ नेता तथा कार्यकर्ता एमालेमा प्रवेश गरेका छन्। रास्वपाका वडा नं. २७ का वरिष्ठ नेता तथा पूर्व वडा अध्यक्ष बुनी प्रसाद यादवसहित नव प्रवेशी नेताहरूले पार्टीमा आबद्ध भएका हुन्।
नव प्रवेशीहरूलाई एमाले केन्द्रीय सदस्य विजय कुमार सरावगी, मधेस प्रदेश कमिटीका उपाध्यक्ष बिचारी यादव, उम्मेदवार रिमा यादव, सखुवाप्रसौनी गाउँपालिका अध्यक्ष यशवन्त यादवलगायत नेताहरूले फुलमाला र दोसल्ला ओढाएर स्वागत गरेका थिए।
भेलामा सम्बोधन गर्दै रिमा यादवले प्राविधिक शिक्षालाई प्राथमिकतामा राख्दै महिलालाई घरेलु तथा व्यावसायिक तालिम प्रदान गर्ने योजना प्रस्तुत गरेकी छन्। सिलाई, कढाई, मस्यौरा बनाउने र हाते कढाई जस्ता सीपमूलक तालिममार्फत महिलालाई आत्मनिर्भर बनाउने र आयआर्जनमा जोड दिने उनको लक्ष्य रहेको छ।
उनी महिला सशक्तीकरणमा जोड दिँदै भनिन्, “महिला अब घरको चुलो–चौकामा मात्र सीमित छैनन्, हरेक क्षेत्रमा उनीहरूको सक्रिय सहभागिता आवश्यक छ। अवसर पाएमा महिला पनि काम गरेर देखाउने क्षमता राख्छिन्। अब समय आएको छ, महिलालाई जिताएर देखाउने।”
साथै, रिमा यादवले प्रत्येक स्वास्थ्य चौकीमा कम्तीमा एक एमबिबिएस डाक्टरको व्यवस्था गर्ने र सुलभ रूपमा औषधि उपलब्ध गराउने आफ्नो प्रमुख लक्ष्य रहेको स्पष्ट पारेकी छन्।